Ekspertët e aviacionit theksojnë se shkak i tragjedisë në qytetin Ahmedabad të Indisë mund të ketë qenë pozicioni i krahëve të avionit gjatë ngritjes në ajër. Ekspertët analizuan për BBC videot e tmerrshme, që tregonin momentet e rënies së avionit, që la pas të paktën 290 viktima. “Shasia është ende e ulur, por krahët janë tërhequr. Kjo do të thotë që krahët ishin në një linjë me trupin e aeroplanit, gjë që është shumë e pazakontë kaq shpejt pas ngritjes. Shasia zakonisht tërhiqet brenda 10-15 sekondave dhe krahet më pas tërhiqen gjatë një periudhe prej 10-15 minutash”, u shpreh eksperti i aviacionit, Geoffrey Thomas. Ndërkohë, një pilot me eksperiencë, Saurabh Bhatnagar, tha se shkak i tragjedisë mund të jetë bërë dhe përplasja me një tufë zogjsh. “Në pamje të parë duket si një goditje e shumëfishtë shpendësh, cka i ka bërë të dy motorët të humbin fuqinë”, tha ai. Nga ana tjetër, i mbijetuari i tragjedisë, 40-vjeçari britaniko-indian Vishëash Kumar Ramesh, rrëfeu momentet e tmerrit të rrëzimit të avionit vetëm pak çaste pas ngritjes në ajër. “Tridhjetë sekonda pas ngritjes në ajër u dëgjua një zhurmë e fortë, pastaj avioni u përplas”, tha ai, i cili aktualisht ndodhet i shtruar në spitalin e qytetit Ahmedabad, vetëm pak metra larg vendit ku ndodhi tragjedia. Ai ishte ulur në vendin 11A, i cili në avionët Boeing 787 përkon me një vend pranë dritares, pothuajse në lartësinë e krahut të avionit.