Një tragjedi ka goditur një familje shqiptare në Jacksonville të Floridës, ku tre djem të mitur humbën jetën pasi banesa e tyre dykatëshe u përfshi nga flakët. Katër persona të tjerë, dy të rritur dhe dy fëmijë, ndodhen në gjendje kritike. Të afërmit që mbërritën në vendngjarje konfirmuan se familja është me origjinë nga Shqipëria. Alarmi u dha rreth orës 05:15 të së mërkurës. Zjarrfikësit mbërritën brenda pak minutash dhe u përballën me flakë të fuqishme në katin e parë, ndërsa kati i dytë ishte mbuluar nga tymi i dendur. Një fqinj tregoi për televizionin lokal se banorët ndihmuan në shpëtimin e një foshnjeje dhe një të rrituri, të cilët u hodhën nga dritarja e katit të dytë dhe u kapën nga personat që ndodheshin poshtë. Kur mbërritën zjarrfikësit, dy të rritur dhe dy fëmijë kishin dalë nga banesa. Gjatë kërkimeve brenda ndërtesës, ekipet e shpëtimit gjetën pa jetë tre fëmijët, të gjithë djem. Moshat dhe identitetet e tyre nuk janë bërë ende publike. Katër të mbijetuarit u dërguan me urgjencë në spital në gjendje kritike. Zjarri u vu nën kontroll rreth orës 05:40, por banesa u shkatërrua plotësisht dhe dy njësi të tjera u dëmtuan. Kryqi i Kuq Amerikan po ndihmon shtatë të rritur dhe gjashtë fëmijë që mbetën pa strehë.