Një aksident i rëndë ndodhi këtë të enjte në Itali, ku aventura me teleferik u kthye në tragjedi për disa turistë. Shkëputja e kabllove që mbanin teleferikun Monte Faitos iu mori jetën katër turistëve, ndërsa shoferi i kabinës rezulton ende i zhdukur. Ngjarja ndodhi në orët e pasdites, kur një nga kabinat e sipërme të teleferikut ra në tokë, pak para se të mbërrinte në stacionin përfundimtar. Teleferiku lidh qytetin Castellammare di Stabia me malin Faito, një zonë e njohur turistike, ku vetëm këtë vit u përdor nga mbi 113 mijë persona. Në kabinën tjetër, më poshtë, ndodheshin 16 persona, shumica turistë të huaj. Fatmirësisht, ajo mbeti pezull pranë stacionit të nisjes dhe të gjithë pasagjerët u shpëtuan. Ekipet e shpëtimit, zjarrfikësit, policia, emergjencat mjekësore, vullnetarët e mbrojtjes civile, si dhe Prefekti i Napolit e Presidenti i këtij rajoni, Vincenzo De Luca, mbërritën në vendngjarje për të ndjekur nga afër situatën. Pas përfundimit të operacioneve të shpëtimit, Prokuroria do të nisë një hetim për të zbuluar arsyet e këtij aksidenti tragjik dhe për të përcaktuar nëse ka pasur ndonjë neglizhencë apo gabim teknik.