Të paktën 12 emigrantë u mbytën të martën pasi anija e tyre u fundos në përpjekje për ta kaluar Kanalin e Lë Manshit për në Britaninë e Madhe. Lajmin e konfirmoi ministri i Brendshëm i Francës, Gerald Darmanin, i cili tha gjithashtu se 6 prej viktimave ishin fëmijë. Ai shtoi se operacionet e kërkimit janë duke vazhduar për gjetjen e dy personave të zhdukur. Lufta ndaj emigrimit të jashtëligjshëm ka qenë prioritet i qeverive të Francës dhe Britanisë së Madhe. Më shumë se 2.000 njerëz kanë mbërritur në Mbretërinë e Bashkuar përmes anijeve të vogla gjatë shtatë ditëve të fundit, sipas të dhënave të qeverisë britanike. Kanali është njëra prej rrugëve më të përdorura detare të transportit të mallrave në botë dhe rrymat e ujit në të janë të fuqishme, gjë që e bën shumë të rrezikshëm udhëtimin me anije të vogla. Në gusht, dy njerëz u gjetën të vdekur pasi një anije që po transportonte emigrantë në përpjekje për ta kaluar Kanalin, hasi në vështirësi për shkak të rrymave.