Të paktën 16 persona kanë humbur jetën në një rrëshqitje dheu që varrosi familje të tëra nën baltë dhe rrënoja në një fshat malor në Ekuador. Zjarrfikësit, policia dhe ekipet e specializuara të shpëtimit janë dërguar në kantonin Alausí, në malet e Andeve, për të kërkuar banorët e bllokuar. Gjashtë persona janë nxjerrë të gjallë nga balta, por qeveria tha se të paktën shtatë të tjerë ishin ende të zhdukur. Sipas mediave vendase si pasojë e rëshqitjes së dheut janë prekur rreth 500 persona. Ata deklaruan se banorët kishin paralajmëruar për formimin e linjave të çarjeve në zonë pas reshjeve të dendura. Vetëm ditë më parë, autostrada që lidh Alausín me Guamote u mbyll për një kohë të pacaktuar pasi asfalti ishte hapur. Në pamje e shpërndara në media shiheshin dhjetëra punonjës dhe civilë që gërmonin dheun në kërkim të të mbijetuarve, në rajonin malor. Zyrtarët thonë se sezoni shirave në Ekuador ka shkaktuar deri tani vdekjen e 22 njerëzve, ka shkatërruar 72 shtëpi dhe ka dëmtuar mijëra të tjera. Pamjet: AFP