Një tragjedi e rëndë ka goditur një familje në Pejë, pasi dy vëllezër humbën jetën brenda pak orësh, duke lënë në dhimbje të thellë të afërmit dhe gjithë komunitetin. Fillimisht, Gazmend Maloku, i njohur nga familjarët dhe miqtë me nofkën “Meni”, humbi jetën në mënyrë aksidentale. Lajmi për vdekjen e tij tronditi familjen dhe njerëzit e afërt. Por drama nuk përfundoi me kaq. Vetëm pak kohë më vonë, edhe vëllai i tij, Bashkim Maloku, ndërroi jetë pasi pësoi rëndim të menjëhershëm të gjendjes shëndetësore. Sipas burimeve, Bashkimi nuk arriti ta përballonte dhimbjen e madhe për humbjen e të vëllait. Ai u dërgua për trajtim në spital, por ndërroi jetë rreth një orë pasi kishte marrë lajmin tragjik. Dy humbje të njëpasnjëshme brenda të njëjtës ditë kanë tronditur jo vetëm familjen Maloku, por edhe qytetarë të shumtë në Pejë, të cilët kanë shprehur ngushëllimet dhe solidaritetin e tyre për familjarët në këtë moment tepër të vështirë.