Fluksi i jashtëzakonshëm i automjeteve ka rënduar ndjeshëm qarkullimin në të gjitha akset rrugore që lidhin qytetin e Elbasanit me Tiranën, duke krijuar trafik kilometrik. Kthimi masiv i qytetarëve drejt kryeqytetit, pas fundjavës së kaluar në zonat turistike të Juglindjes së vendit dhe në bregdetin e Adriatikut, ka sjellë një rritje të ndjeshme të trafikut në akset kryesore rrugore pothuajse gjate gjithe pasdites se te dieles. Një prej pikave më problematike është zona pranë rrethrrotullimit të Bradasheshit, ku nis edhe lidhja me aksin rrugor drejt Tiranës. Fluksi i madh i automjeteve ka bërë që qarkullimi në këtë zonë të jetë thuajse i paralizuar, me radhë të gjata automjetesh në të dyja drejtimet. Për menaxhimin e situatës, në të gjitha segmentet problematike janë vendosur forca të shumta të Policisë Rrugore, të cilat po punojnë për disiplinimin e trafikut dhe lehtësimin e lëvizjes së automjeteve. Megjithatë, përmasat e fluksit kanë tejkaluar kapacitetin normal të këtyre akseve rrugore, duke bërë që qarkullimi të mbetet i ngadalësuar.