Policia e Sarandës prej muajsh ishte përfshirë në hetime voluminoze për të zbuluar një rrjet të mirëorganizuar të trafikut të narkotikëve. Operacioni policor i koduar “Rrjeti”, është mbështetur edhe prej forcave të ndërhyrjes së shpejtë të Fierit dhe forcat e Posaçme Shqiponja të Vlorës ku u godit një pjesë të grupit kriminal që ushtronte veprimtarinë e shitjes së lëndëve narkotike në doza, kryesisht në Sarandë dhe Delvinë. Kështu janë ekzekutuar 11 arrestime për pjesëtarët e këtij grupi konkretisht shtetasit: Mili Hamzaj, dhe Evinio Hamzaj, 35 dhe 26 vjeç (vëllezër), Fatjon Abazi, dhe Osmën Abazi, 35 dhe 29 vjeç (vëllezër), Xhuljan Meçani dhe Stelio Meçani, 27 dhe 21 vjeç (vëllezër), Eduart Taka, 30 vjeç, Juxhin Isufi, 32 vjeç ,Drago Qëndro, 35 vjeç të gjithë banues në Delvinë. Policia ka arrestuar si pjesë të të njëjtit rrjet edhe Enver Haxhi 68 vjeç dhe Mina Dedi 42 vjeç banues në Sarandë. Gjatë operacionit policor është arrestuar në flagrancë edhe shtetasi 36 vjeçar Algert Caushi,të cilit pas kontrollit në banesë dhe automjet ju gjetën doza kokaine dhe sende të paligjshme, radio për shërbime policore si dhe shkopinj metalikë. Gjatë operacionit janë sekuestruar në total: 120 doza kokaine dhe kanabisi, 18 aparate celularë, 1 tablet, 4 automjete, 2 motomjete, 2 radio policore, 2 shkopinj metalikë, 2 peshore elektronike dhe një shumë totale parash prej rreth 63 mijë euro e dyshuar si e përfituar nga kjo veprimtari. Zyrtarisht u njoftua se veprimet hetimore vijojnë, për dokumentimin e plotë të veprimtarisë kriminale të këtij grupi, si dhe për identifikimin dhe kapjen e shtetasve të tjerë të përfshirë.