Një aksion i koordinuar ndërkombëtarisht ka rezultuar në arrestimin e më shumë se 150 personave dhe identifikimin e mbi 1,000 viktimave të trafikimit të qenieve njerëzore. Operacioni përfshiu forca të rendit nga 43 shtete të ndryshme në Evropë, Azi, Afrikë dhe Amerikën Jugore. Sipas Interpolit, rreth 15 mijë oficerë policie morën pjesë në këtë ndërhyrje gjashtëditore, e cila kishte për qëllim goditjen e rrjeteve kriminale të përfshira në trafikimin e njerëzve, me fokus të veçantë tek viktimat e mitura, të shfrytëzuara për qëllime seksuale, punë të detyruar apo lypje. Pjesa më e madhe e viktimave të shfrytëzimit seksual janë gra, të cilat zakonisht rekrutohen nga vende të tjera dhe më pas dërgohen në ambiente si sallone masazhi, ku detyrohen të ushtrojnë prostitucion. Operacioni, i koduar “Zinxhiri Global”, ka çuar në 158 arrestime dhe ka identifikuar edhe 205 persona të tjerë të dyshuar si të përfshirë në aktivitetet kriminale. Në total, autoritetet raportuan se kanë zbuluar 1,194 viktima të mundshme. Ndërhyrja u udhëhoq nga autoritetet austriake dhe rumune, me fokus të veçantë në vendet evropiane, por arrestime janë kryer edhe në shtete si Tajlanda, Nigeria dhe Vietnami.