Banorët e Dimalit protestuan sërish mbrëmjen e të hënës kundër hartës së re territoriale, që parashikon bashkimin e kësaj bashkie me Beratin. Me moton "Dimali mbetet Dimal. Zëri i qytetarëve duhet të dëgjohet", banorët e bashkisë Dimal kanë kërkuar që qeveria mos ta prekë këtë bashki. Sipas banorëve, bashkimi i Dimalit me Beratit do të ndikojë negativisht jo vetëm në marrjes e shërbimeve të nevojshme të qytetarëve, por edhe në zhvillimin ekonomik të një prej bashkive të vendit, që me prodhimet bujqësore dhe serat, furnizon prej vitesh tregjet ndërkombëtare. Po kështu, edhe Këshilli Bashkiak Dimal në një mbledhje urgjente të hënën miratoi si të pavlefshëm propozimin e mazhorancës për krijimin e 46 bashkive, nga 61 që janë aktualisht. Këshilltarët e majtë dhe të djathtë bashkuan votat kundër këtij propozimi.