Gjatë një seance të zhvilluar me dyer të mbyllura, Gjykata e Durrësit la në fuqi masën e sigurisë "arrest në burg" për 5 të arrestuarit për tjetërsimin e 151 mijë m2 tokë në Spitallë të Durrësit. Gjyqtari Paulin Ccera pasi verifikoi dhe konstatoi respektimin e kushteve për zbatimin e masës shtrënguese arrest në burg vendosi që Leonard Kadrimi, Ardit Kërtusha, Gjovalin Ndoci, Lirim Xhameta dhe Dashnor Taulla të mbeten në të njëjtën masë sigurie të vendosur nga kjo gjykatë paraprakisht të enjten e kaluar. Tre ditë më parë policia e Durrësit ekzekutoi vendimet e gjykatës për arrestimin e këtyre personave që në bashkëpunim kanë tjetersuar pronësinë e një sipërfaqeje të konsiderueshme toke në Spitallë. Në kuadër të të njëjtit hetim janë shpallur në kërkim 2 shtetas të tjerë, mes të cilëve dhe ish-juristi i Kadastrës së Durrësit, Mikel Zaho.