Një tragjedi e ngjashme me atë të Koçanit në Maqedoninë e Veriut është shënuar këtë të martë në Republikën Dominikane. Të paktën 27 persona kanë humbur jetën dhe më shumë se 150 të tjerë janë plagosur nga shembja e çatisë në një klub nate në Santo Domingo. Çatia e klubit të natës Jet Set u shemb teksa në skenë po performonte këngëtarja Rubby Perez, e cila mbeti e plagosur. Lajmi u bë i ditur nga drejtori i Qendrës së Operacioneve Emergjente, Juan Manuel Mendez. Në vendin e ngjarjes kanë mbërritur drejtori i urgjencës dhe ministrat e Mbrojtjes e Shëndetësisë, si dhe Presidenti i vendit. “Na vjen thellësisht keq për këtë tragjedi. Po ndjekim rastin minutë pas minute. Të gjitha agjencitë po punojnë në terren për të ofruar ndihmën e nevojshme”, tha Presidenti Luis Abinader. Deri më tani nuk shihet shkaku i ngjarjes së rëndë dhe as numri i njerëzve që ndodheshin në diskotekë, në momentin e shembjes së çatisë, por mediat vendase raportojnë se në këtë klub nate organizohej koncert çdo të hënë në mbrëmje. “Për sa kohë ka shpresë për jetë, të gjitha autoritetet e vendit popunojnë për të shpëtuar njerëzit e bllokuar nën rrënoja, që kërkojnë ndihmë”, tha drejtori i Qendrës Operative, Mendez. Pak javë më parë, një tragjedi e ngjashme u shënua Koçan të Maqedonisë së Veriut, ku nga zjarri që përfshiu një klub nate, teksa performonte një grup i njohur muzikor, humbën jetën 61 persona dhe u plagosën qindra të tjerë.