“Një privilegj dhe një shpërblim të punëve që kanë transformuar Tiranën”, kështu e vlerësoi kryetari i Bashkisë së Tiranës, Erion Veliaj pjesëmarrjen e kryeqytetit shqiptar në panelin e OKB-së për Zhvillimin e Qëndrueshëm të Qyteteve në Nju Jork. “Ka qenë një javë e jashtëzakonshme në Nju Jork, ku Tirana është bërë pjesë e panelit të Sekretarit të Përgjithshëm të OKB-së për qytetet. Tirana nuk është perfekte, por pemët që janë mbjellë, korsitë e biçikletave, hapësirat pedonale që janë krijuar te sheshi “Skënderbej”, te Pazari i Ri, Liqeni i Farkës, Liqeni i Tiranës, kanë kontribuar që ajri të jetë më i shëndetshëm, që turizmi të rritet, që Tirana të quhet një vend që, jo vetëm po zhvillohet, por zhvillohet në një mënyrë të qëndrueshme, pa dëmtuar natyrën”. Nga Nju Jorku, Veliaj ndau dhe tre projeke të reja pë kryeqytetin shqiptar. “Ne do të vazhdojmë të përdorim shembullin e Tiranës si një mënyrë për të tërhequr më shumë investime, më shumë turistë, dhe për t’u siguruar se ato histori suksesi që kemi parë në Tiranë t’i shumëfishojmë. Vendimmarrja për të pasur disa shtigje që i lidhin të dyja mushkëritë e Tiranës, Parkun e Farkës me Parkun e Liqenit Artificial dhe atë të Liqenit të Thatë, shkon me këtë vizion. Pra, pas Tumo-s ne duam të vazhdojmë me #ECOLE42, - Shkolla 42 e Parisit - gjë që e kemi kaluar me vendim të këshillit bashkiak, për ta pasuar pastaj me qendrën amerikane “Plug & Play”, shtoi Veliaj. Kryebashkiaku u ndal dhe te takimet që zhvilloi së bashku me kryeministrin Rama me shqiptarët në Nju Jork, ku dhe morën vlerësime për mbajtjen e premtimin për të mundësuar votën e diasporës. “Jam vërtet i impresionuar nga mënyra se si i gjithë komuniteti i shqiptarëve në SHBA, në takimin me kryeministrin, por dhe në takime të tjera më të vogla, kanë shprehur mbështetjen për atë vendim të jashtëzakonshëm të shumicës tonë për të mbështetur votën e emigrantëve, një iniciativë që e kemi filluar që në vitet 2009-2010.”