Në përgjigje të rritjes galopante të industrisë së turizmit dhe kërkesës së vazhdueshme të biznesit për staf të kualifikuar, Tirana College of Technology shpalli çeljen e kursit të specializuar “Menaxhimi i Sistemeve Teknike në Hotele”. Ky program, i cili vjen si i pari i këtij lloji në Shqipëri, është konceptuar si një zgjidhje praktike për mirëmbajtjen e ekosistemeve teknike në strukturat akomoduese, duke garantuar siguri dhe cilësi për konsumatorin në përputhje me vizionin e vendit drejt integrimit evropian. E pranishme në lançimin e kursit, ministrja Delina Ibrahimaj vuri theksin te nevoja për një tjetër profil profesionistësh, atë të suportit teknik, si kusht për modernizimin e sektorit. “Ky sektor nuk ka vetëm nevojë për standarde në ofrimin e shërbimeve direkte ndaj klientit, por padiskutim ka nevojë edhe për teknikë të ndryshëm, që njohin specifikat e të gjitha ndërtesave të hotelierisë dhe specifikat e suportit teknik për dhënien e një shërbimi të mirë”, tha Delina Ibrahimaj. “Shqipëria vuan për mungesën e specialistëve të mirëfilltë në fusha të ndryshme të ekonomisë dhe rruga jonë drejt Bashkimit Evropian na kushtëzon hapjen e këtyre kurseve, për formimin e specialistëve në këto drejtime, të cilët të jenë të aftë jo vetëm brenda vendit, por edhe në kuadër të lëvizjes së lirë në Bashkimin Evropian”, tha Rektori i Kolegjit Universitar TCT, Andonaq Lamani. Tirana College of Technology dhe përfaqësuesit e biznesit propozuan që menaxheri teknik të jetë pjesë e detyrueshme e kritereve për licencimin e hoteleve. Një hap që, nëse miratohet, do t’i jepte fund improvizimeve dhe do të niste një epokë të re sigurie në turizmin shqiptar.