Kamala Harris ka zgjedhur Tim Walz, guvernatorin e Minesotës si partnerin e saj për zv.president në garën presidenciale. Në një postim të gjatë në Instagram, Harris shpjegoi vendimin, duke sjellë në vëmendje vendosmërinë e Walz “për të luftuar për familjet e shtresës së mesme”. Më tej postimi rendit disa nga arritjet e guvernatorit të Minesotës, si përpjekjet e tij për të mbrojtur të drejtat e abortit dhe të largimit të paguar nga puna për arsye mjekësore ose familjare. Në një postim në platformën X, të njohur më parë si Twitter, Walz tha se ishte nderi i një jete që t’i bashkohet Harris në këtë garë. Do të jap gjithçka, shtoi më tej ai. Walz katapultoi drejt suksesit me një fjali të thënë në televizion kombëtar ku e etiketonte dyshen republikane Trump – vance si thjesht “tipa të çuditshëm”, një shprehje virale që përdoret tani edhe nga Harris. 60-vjeçari sjell me vete një qasje popullore, të folur të thjeshtë dhe të mprehtë për të përballur opozitën republikane. Ai gjithashtu vjen me një rezyme bindëse - një mësues në shkollë publike, trajner futbolli dhe pjesë e gardës kombëtare përpara se të hynte në politikë. Zgjedhjen e tij e përshëndeti edhe presidenti Biden në rrjete sociale: Kjo dyshe fituese do të jetë një zë i fuqishëm për klasën punëtore dhe klasën e mesme amerikane” tha ai në platformën X. Ndërkohë kampi i presidentit Trump në një deklaratë e etiketoi atë si një liberal ekstremist të rrezikshëm. Shumë të tjerë brenda kampit republikan e kanë portretizuar Walz si një zgjedhje të dobët që rrit shancet e Trump në garë.