Pas kaosit të opozitës në parlament, grupi parlamentar i PS kërkon ndëshkimin e 24 deputetëve të opozitës. Në kërkesën për marrje mase disiplinore thuhet se “Deputetët e opozitës që në nisje të seancës i janë drejtuar foltores duke e bllokuar atë dhe duke u konfliktuar fizikisht me punonjësit e Gardës së Republikës. “Deputetët Gazment Bardhi, Flamur Noka, Bledion Nallbati goditën me mjete shumë të forta drejt Kryetares së Kuvendit dhe anëtarëve të Këshillit të Ministrave, mjete të cilat mund të rrezikonin dhe jetën, dhe vënia në rrezik e jetës brenda sallës së Kuvendit të Shqipërisë është e papranueshme” thuhet në kërkesën e grupit parlamentar socialist. Masa disiplinore kërkohet ndaj Gazmend Bardhit, Flamur Nokës, Bledion Nallbatit, Edi Palokës, Saimir Korreshit, Lefter Geshtenjës, Luan Baçit, Dashnor Sulës, Agron Gjekmarkajt, Dhurata Çupit, Xhelal Mziut, Ina Zhupës, Zheni Gjergjid, Helidon Bushatit, Lindita Metaliajt, Ramadan Likës, Asllan Dogjanit, Qani Xhafës, Flamur Hoxhës, Isuf Çelës, Kastriot Pirolit, Lodovik Hasanit, Kasem Mahmutajt dhe Edmond Spahos. Pas kaosit reagoi edhe kryetarja e Kuvendit, Elisa Spiropali, që thotë se djegia e karrigeve dëshmon nivelin më ekstrem të mungesës së respektit për qytetarët. “Fatkeqësisht zjarrin mbi parlamentet e kanë vënë vetëm përbuzësit dhe shkatërruesit më të mëdhenj të demokracisë në historinë e saj”, ka shkruar Spiropali në facebook.