Një tentativë për të futur sende të ndaluara në ambientet e burgut të Pojskës në Pogradec ka vënë në lëvizje policinë. Tre anëtarë të një familjeje meshtetësi rumune, babai, nëna dhe vëllai janë shoqëruar në komisariat, pasi u kapën në flagrancë duke tentuar të fusnin një thikë dhe një telefon celular në Institucionin e Ekzekutimit të Veprave Penale për gra në Pojskë. Ngjarja u zbulua gjatë procedurave standarde të kontrollit përpara takimeve të familjarëve. Shtetasit e huaj kishin udhëtuar drejt këtij institucioni për të vizituar të afërmen e tyre, e cila po vuan një dënim penal për veprën e mashtrimit. Sipas burimeve zyrtare, gjatë kontrollit të hollësishëm të çantave me rroba që prindërit dhe vëllai kishin sjellë për të dënuarën, punonjësit e sigurisë së burgut konstatuan sendet e fshehura në njërën prej tyre. Nga verifikimet e para në sistemin TIMS ka rezultuar se familja rumune kishte mbërritur në territorin e Shqipërisë vetëm dy ditë përpara se të kryente vizitën në burg. Tre familjarët u morën në pyetje nga hetuesit në prani të avokatit dhe të një përkthyesi për të sqaruar qëllimin e këtij veprimi. Ajo që mbetet ende e paqartë për grupin hetimor është arsyeja e futjes së një arme të ftohtë si thika në një burg të sigurisë për gra. Burime nga burgu i Pojskës bëjnë me dije se e dënuara rumune nuk njihet si person problematik brenda institucionit dhe nuk ka pasur konflikte apo përplasje me të dënuarat e tjera. Pas zbulimit të rastit, policia dhe gardianët ushtruan një kontroll të befasishëm edhe në qelinë ku qëndron e dënuara, por aty nuk u gjet asnjë send tjetër i paligjshëm. Hetimet po vijojnë për të zbardhur nëse ka persona të tjerë të përfshirë në këtë ngjarje