Një aksident i rëndë ajror tronditi këtë të hënë kryeqytetin e Bangladeshit, Dhaka, ku një avion stërvitor i Forcave Ajrore u rrëzua mbi një shkollë, duke shkaktuar të paktën 20 viktima, shumica prej tyre nxënës, ndërsa 200 mbetën të plagosur. Ngjarja ndodhi në zonën veriore të qytetit, në lagjen Uttara, ku avioni u përplas mbi Milestone School and College, pas një defekti që pati pak minuta pas ngritjes, duke shkaktuar një zjarr masiv dhe një shtëllungë të dendur tymi që pushtoi zonën. Pamjet nga vendngjarja tregojnë një skenë kaotike, me ndërhyrje të menjëhershme të zjarrfikësve dhe ambulancave për të shpëtuar të mbijetuarit. Më shumë se 80 persona – përfshirë fëmijë dhe të rritur – janë dërguar me urgjencë në Institutin Kombëtar të Djegieve dhe Kirurgjisë Plastike, ku ndodhen nën trajtim për djegie të rënda, sipas autoriteteve. Forcat e Armatosura të Bangladeshit konfirmuan se avioni i prodhimit kinez pak pas ngritjes u përplas në kampusin e shkollës fillore dhe të mesme Milestone, ndërsa nuk dihen ende shkaqet e aksidentit tragjik. Kryeministri i Bangladeshit, Muhammad Yunus, deklaroi se do të ndërmerren të gjitha masat e nevojshme për të hetuar ngjarjen dhe për të ndihmuar të prekurit. “Do të sigurojmë çdo ndihmë të mundshme për familjet e viktimave dhe të plagosurit”, tha ai. Ky është aksidenti më vdekjeprurës ajror në Bangladesh në vitet e fundit. Sipas raportimeve të mediave, afër 2000 nxënës të shkollës fillore deri në klasën e dymbëdhjetë ndjekin mësimet në shkollën ku u rrëzua avioni ushtarak.