Politikani britanik, Nigel Farage, një zë i fortë kundër emigrantëve shqiptarë, rezulton të ketë blerë një pronë me vlerë 1.4 milionë paund me para në dorë, menjëherë pasi mori një dhuratë personale prej 5 milionë paundësh nga miliarderi i kriptomonedhave, Christopher Harborne. Zbulimi i ‘The Guardian” vjen pasi organi mbikëqyrës i standardeve të parlamentit konfirmoi veçmas se udhëheqësi i Reform UK po përballej me një hetim formal mbi dhuratën nga biznesmeni me bazë në Tajlandë. I pyetur në lidhje me blerjen e pronës, një zëdhënës i partisë Reform UK tha se “Procesi i ofertës dhe blerjes së pronës filloi para dhuratës”. Megjithatë, Partia Laburiste i bëri thirrje udhëheqësit të Reformës të deklarojë plotësisht se për çfarë u përdorën 5 milionë paundët, të cilat u zbuluan për herë të parë nga “The Guardian”. Farage ka thënë se dhurata kishte për qëllim të mbulonte shpenzimet e tij personale të sigurisë dhe për këtë arsye nuk kishte nevojë të deklarohej. Megjithatë, partitë e tjera argumentojnë se paratë nga biznesmeni me bazë në Tajlandë bien ndesh me rregullat që kërkojnë që deputetët të deklarojnë çdo dhuratë ose donacion të rëndësishëm të marrë në 12 muaj para se të hynin në parlament.