Tirana dhe Beogradi zyrtar vijojnë përplasjen pas deklaratës së presidentit serb, Aleksandër Vuçiç, për ndryshimin e rrjedhës së lumit Ibër, që do të rrezikonte furnizimin me ujë të Kosovës. Pas qëndrimit të kryeministrit Edi Rama dhe Tiranës Zyrtare se Serbia nuk mund të pretendojë që pasojat e mundshme të devijimit të lumit Ibër ndalen në kufirin e saj, duke hedhur poshtë dhe pretendimet për “Shqipërinë e Madhe”, përplasja mes dy vendeve vijoi të martën me ministrat e Integrimit. Ministri serb për Integrimin Evropian, Nemanja Staroviç, akuzoi kreun e qeverisë shqiptare se po anashkalon Kartën e OKB-së dhe Rezolutën 1244 të Këshillit të Sigurimit, duke këmbëngulur se Kosova mbetet pjesë e Serbisë. "Kosova ndodhet brenda kufijve të njohur nga OKB-ja të Serbisë. Këta kufij janë, dhe duhet të mbeten, të paprekshëm, pavarësisht nëse flasim për Serbinë, Ukrainën, Kinën apo Qipron (përfshirë, natyrisht, edhe Shqipërinë). Të flasësh për marrëdhënie të mira fqinjësore, ndërkohë që refuzon të respektosh integritetin territorial të fqinjit tënd, nuk është gjë tjetër veçse hipokrizi e mbështjellë me fjalë boshe”.