"Nuk mund të më japësh mësime publike për atë se çfarë është nacionalizmi". Kështu e nis përgjigjen e tij ish-kryeministri grek Aleksis Tsipras ndaj Edi Ramës, pas debatit që shpërtheu sot mes tyre për ngjarjet e së shtunës në Zvërnec. Në reagimin e tij publik në rrjetin social X, Tsipras deklaroi se qëndrimi i secilit ndaj nacionalizmit provohet nga veprimet dhe jo nga fjalët, duke kujtuar rolin e tij në Marrëveshjen e Prespës dhe përpjekjet për bashkëpunim në Ballkan. Ai theksoi se mbrojtja e të drejtave të pakicave nuk duhet të ngatërrohet me nacionalizmin dhe kërkoi që autoritetet shqiptare të garantojnë të drejtat ligjore të të gjithë personave të përfshirë në çështje. Ish-kryeministri grek u ndal edhe te të drejtat e pronësisë, duke kujtuar se, sipas tij, respektimi i tyre është pjesë e rëndësishme e rrugës europiane të Shqipërisë.