Qindra viktima e rreth 2 mijë të zhdukur. Ky është bilanci i katastrofës natyrore në Nepal dhe Tibet. Autoritetet njoftuan rinisjen e kërkimeve për personat e zhdukur, të pezulluara më herët, pasi një liqen i krijuar nga rrëshqitja e dheut në kufirin mes dy vendeve, kishte nisur të dilte përsëri nga shtrati, duke krijuar frikë për një valë të dytë përmbytjesh në zonat që u shkatërruan nga katastrofa dy ditë më parë. Mes të zhdukurve janë 575 turistë të huaj nga 26 vende. Mbi 100 prej tyre janë shtetas indianë, ndërsa raportohen edhe 45 amerikanë, 33 britanikë, si edhe turistë nga Holanda, Gjermania, Franca, Meksika dhe Brazili. Katastrofa u shkaktua nga reshje të dendura dhe të vazhdueshme, të cilat sollën përmbytje të menjëhershme dhe destabilizuan terrenin malor, duke shkaktuar rrëshqitje masive dheu. Terreni i vështirë dhe dëmtimi i rrugëve e kanë komplikuar ndjeshëm ndërhyrjen e ekipeve të shpëtimit. Shkak i katastrofës natyrore dyshohet një akullnajë, e cila u shkëput si pasojë e temperaturave të larta, duke bllokuar përkohësisht rrjedhën e lumit dhe më pas duke çliruar një masë të madhe uji. Shembja e masave të akullit dhe shkëmbinjve shkaktoi një rrjedhë të fuqishme uji, balte dhe mbeturinash, e cila u përhap me shpejtësi në drejtim të zonave të banuara.