Prokuroria e Posaçme Antikorrupsion ka sekuestruar një vilë në zonën e Palasës, në kuadër të hetimeve që po zhvillohen për ish-zëvendëskryeministren Belinda Balluku, e marrë e pandehur nga autoritetet e drejtësisë për disa vepra penale. Vila e sekuestruar së fundi në Palasë ka një sipërfaqe 478 metra katrorë dhe dyshohet se është përfituar në mënyrë të paligjshme nga Balluku dhe përmes kontratave, që SPAK i konsideron fiktive. “Nga hetimi rezulton se e pandehura Belinda Balluku ka në pronësi faktike pasurinë e paluajtshme “Vila familjare”, në Palasë, Himarë, e cila ka rezultuar se është një pasuri e fshehur. Për të fshehur këtë pasuri të padeklaruar, e pandehura Belinda Balluku ka kryer veprime fiktive nëpërmjet kontratës së sipërmarrjes, datë 26.10.2020, në shumën 250,000 Euro, vlerë që përfshinte investimin deri në ndërtimin e pasurisë në fazën e karabinasë. Investimi është marrë përsipër dhe realizuar nga shtetasi Arbër Abazi, pronar i shoqërisë “Alko Impex General Construction”. E pandehura Belinda Balluku, për shkak të funksionit, Ministër i Infrastrukturës dhe Energjisë, në këmbim të favorizimit të shoqërisë “Alko Impex General Construction”, në procedurën e prokurimit të sipërpërmendur, ka kërkuar dhe marrë nga shtetasi Arbër Abazi, vlerën e përfitimit të parregullt”. Më herët, SPAK sekuestroi një tjetër vilë prej 103 metra ketarorë në Dhërmi, që dyshohet se e zotëronte fshehurazi Belinda Balluku. Ish-zëvendëskryeministrja dhe ish-ministrja e Infrastrukturës dhe Energjisë, Belinda Balluku, është nën hetim nga SPAK për ‘shkelje të barazisë në tendera’, ‘korrupsion’ dhe ‘pastrim parash’. Për Ballukun janë dhënë dy masa sigurie, ‘ndalim për të dalë jashtë vendit’ dhe ‘pezullim nga ushtrimi i funksioneve publike’.