Është gjëja e duhur për vendin sipas tij, por sekretari britanik i Shëndetësisë, Wes Streeting, e ka pranuar edhe vetë se nuk ndihet i qetë me idenë e dëbimit me forcë të familjeve shqiptare sipas planit të ri të sekretares së brendshme për emigracionin, Shabana Mahmood. Ministri i cituar nga The Guardian e pohon se ka menduar që numri i dëbimeve të detyruara do të jetë i ulët sipas modelit të propozuar, i ngjashëm me atë të Danimarkës sepse në arsyetimin e tij, njerëzit që hyjnë ilegalisht në Mbretërinë e Bashkuar do të kenë më shumë stimuj financiarë për t’u kthyer vullnetarisht në vendet e tyre. I pyetur nëse ndihet rehat me një politikë që dhjetëra deputetë laburistë e kundërshtojnë, Streeting u përgjigj: “Sinqerisht? A ndihem rehat? Jo. Por a është kjo gjëja e duhur për vendin? Po.” Në një intervistë për LBC, ai pretendon se Shabana Mahmood thjesht po sigurohet që “ aty ku njerëzit nuk kanë të drejtë të qëndrojnë këtu, do të dëbohen…por edhe do të mbështeten për t`u zhvendosur..Kështu numri i dëbimeve me force, nga sa pretendon Streeting, duhet të mbetet i ulët”. Komentet e tij, the Guardian i interpreton si shenjë të faktit që e kupton shqetësimin e disa deputetëve laburistë, të cilët kanë paralajmëruar mbi pasojat që mund të ketë dëbimi me forcë i familjeve nëse i refuzojnë stimujt financiarë për t’u kthyer në vendin e tyre. Sipas medias së njohur, Keir Starmer dhe Mahmood sakaq po përballen me kërcënimin e një revolte të brendshme, në një kohë kur krahu i majtë më i moderuar i partisë po shpreh pakënaqësi në rritje lidhur me lidershipin e Laburistëve. The Guardian nuk la pa përmendur edhe reagimin e kryeministrit Edi Rama, i cili e akuzoi Shabana Mahmoodin për “stereotipike etnike” dhe “demagogji të pahijshme”.