Një tërmet i fuqishëm me magnitudë 7.4 të shkallës Rihter goditi bregun perëndimor të Meksikës pasditen e të premtes, tha Shërbimi Gjeologjik i SHBA-së (USGS). Epiqendra e tërmetit ishte 71 kilometra në jugperëndim të Puerto Madero, në një thellësi prej rreth 10 kilometrash. Lëkundja u ndje edhe në Guatemalën fqinje, duke bërë që shumë banorë të evakuohen. Ndërkohë, pas lëkundjes së fuqishme autoritetet kanë lëshuar edhe një paralajmërim për cunami. Ishte Sistemi i Paralajmërimit për Cunami i Shërbimit Kombëtar të Motit të SHBA-së (NOAA) që lëshoi dy paralajmërime për cunami për zonat bregdetare të Meksikës dhe Guatemalës, pranë epiqendrës së tërmetit. Sipas autoriteteve, valët me lartësi nga 0.3 metra deri në 1 metër mbi nivelin e baticës mund të ndodhin në brigje të Guatemalës dhe Meksikës. Parashikohet që valët të jenë më të ulëta se 0.3 metra mbi nivelin e baticës përgjatë brigjeve të Kolumbisë, Kosta Rikës dhe Ekuadorit, si dhe të disa zonave të tjera.