Një situatë e pazakontë ka ndodhur në orët e para të mëngjesit në Komisariatin e Sarandës. Një 22-vjeçar i arrestuar dyshohet se ka tentuar të largohet nga ambientet e izolimit, duke u përplasur fizikisht me efektivët e policisë. Situata është përshkallëzuar dhe për qetësimin e saj është dashur ndërhyrja e forcave shtesë. Bëhet fjalë për Devis Saliajn, një prej 20 personave të arrestuar në kuadër të operacionit të koduar “Vjeshta”. Ngjarja ka ndodhur rreth orës 01:30. Saliaj kishte kërkuar të shoqërohej në tualet për nevoja personale, ndërsa gjatë kthimit drejt ambientit të izolimit, sipas të dhënave paraprake, ka kundërshtuar efektivët dhe dyshohet se ka tentuar të largohet. Në korridor situata është përshkallëzuar. 22-vjeçari dyshohet se ka goditur dhe ka hedhur sende që ndodheshin në ambientet e komisariatit, ndërsa policët kanë ndërhyrë për ta neutralizuar. Për shkak të situatës së krijuar, janë kërkuar forca shtesë policie, të cilat kanë ndërhyrë për të qetësuar incidentin. Pas ndërhyrjes, Saliaj është vënë nën kontroll dhe është rikthyer në ambientin e izolimit. Por pas kësaj ngjarjeje, tre efektivë të Policisë së Shtetit janë pezulluar nga detyra: Armando Bizhga, Dhimitër Gugu dhe Leons Cani. Arsyet konkrete që kanë çuar në këtë masë nuk janë bërë ende të qarta. Ndërkohë, Agjencia e Mbikëqyrjes Policore ka nisur hetimet, për të zbardhur rrethanat e incidentit dhe për të përcaktuar nëse ka pasur shkelje apo përgjegjësi nga ana e efektivëve.