Ministria e Mbrojtjes e Rumanisë dënon fuqishëm cënimin e hapësirës së saj ajrore nga një dron rus të shtunën gjatë një sulmi në Ukrainën fqinje. Sipas sqarimeve zyrtare Dy avionë luftarakë rumunë F-16 e detektuan dronin Geran, ndoqën lëvizjet e tij për 50 minuta mbi Rumani përmes radarëve, por pavarësisht se kishin autorizim nuk qëlluan. Megjithatë në deklaratën zyrtare, ky incident përbën një sfidë të re për sigurinë dhe stabilitetin rajonal në zonën e Detit të Zi”. “Incidente të tilla tregojnë mungesën e respektit të Federatës Ruse për normat e së drejtës ndërkombëtare dhe vënë në rrezik jo vetëm sigurinë e qytetarëve rumunë, por edhe sigurinë kolektive të NATO-s”, u tha në reagim.“Ndërhyrja e Rusisë në hapësirën ajrore rumune është edhe një herë një shkelje e hapur e sovranitetit të BE-së dhe një kërcënim serioz për stabilitetin e rajonit”, tha presidentja e Komisionit Evropian Ursula von der Leyen. Ndërsa sekretari i Përgjithshëm i NATO-s, Mark Rutte, deklaroi se NATO ka nisur një nismë të re për të mbrojtur krahun e saj lindor pas shkeljeve të hapësirës ajrore nga Rusia që dyshohet se ishin të qëllimshme. Ndryshe nga deri më sot operacionet si ato p.sh. kundër dronëve rusë në të ardhmen do të realizohen nën një komandë të integruar - e jo më me aksione të veçuara kombëtare, të cilat duhen koordinuar me vështirësi, tha Rute. Ushtria gjermane në të ardhmen do të verë në dispozicion katër avionë luftarakë "Eurofighter" për hapësirën ajrore mbi Poloni. Franca do të verë në dispozicion tre avionë luftarakë "Rafale", ndërsa Danimarka dy avionë F-16 dhe një fregatë.