Kryeministri britanik Keir Starmer është pritur me reagime të forta dhe fishkëllima gjatë një vizite në lagjen Golders Green në veri të Londrës, një zonë me komunitet të madh hebre, ku vetëm një ditë më parë ndodhi një tjetër sulm i dhunshëm që la dy persona të plagosur. Sipas autoriteteve britanike, sulmi i djeshëm është cilësuar si “terrorist”, ndërsa ai ka shtuar edhe më tej tensionet në zonë, e cila javët e fundit është përfshirë nga një seri incidentesh antisemitiste që kanë shqetësuar thellësisht banorët dhe komunitetin lokal hebre. Gjatë vizitës së tij, dhjetëra qytetarë u mblodhën jashtë ambienteve të një shërbimi emergjence të komunitetit hebre. Disa prej tyre brohorisnin kundër kryeministrit, me thirrje si “Starmer është frikacak” dhe “Keir Starmer po i lëndon hebrenjtë”, ndërsa në sfond dëgjoheshin edhe fishkëllima ndaj autokolonës së tij zyrtare. Atmosfera në vendngjarje ishte e tensionuar dhe e ngarkuar emocionalisht.