Janë tensionuar edhe më shumë marrëdhëniet mes Kosovës dhe Serbisë. Autoritetet në Prishtinë i refuzuan kërkesën për vizitë ministrit serb të Informacionit dhe Telekomunikacionit, Dejan Ristiç, si kundërpërgjigje ndaj një vendimi të ngjashëm të marrë nga Beogradi. Ky vendim vjen pasi Serbia ka ndaluar ministrin e Brendshëm të Kosovës, Xhelal Sveçla, që të zhvillojë vizitë zyrtare në Luginën e Preshevës. Lajmi është bërë i ditur nga Ministria e Jashtme e Kosovës, e cila njofton se ministri Sveçla kishte paralajmëruar vizitë zyrtare në Preshevë, në datën 23 dhe 24 dhjetor, por Qeveria e Serbisë i ka refuzuar kërkesën. “Përkundër faktit që janë ndjekur të gjitha procedurat e parapara për vizita të tilla zyrtare të përfaqësuesve qeveritarë dhe shtetërorë të Republikës së Kosovës në Serbi sipas Marrëveshjes së Brukselit për Vizita Zyrtare, Qeveria e Serbisë e ka refuzuar kërkesën për lejimin e kësaj vizite. Si pretekst për refuzim janë theksuar qëndrimet dhe veprimet e ministrit Sveçla, të cilat, sipas Qeverisë së Serbisë, janë të drejtuara kundër komunitetit serb në Republikën e Kosovës si dhe kundër normalizimit, paqes dhe stabilitetit”. Më tej, Ministria e Jashtme e Kosovës njofton se Serbia nuk ka refuzuar vetëm Sveçlën, por edhe ministrat e tjerë të qeverisë. “Qeveria e Serbisë gjatë këtyre dy viteve të fundit ka refuzuar rregullisht vizitat e zyrtarëve të lartë qeveritarë të Republikës së Kosovës, posaçërisht kur bëhet fjalë për vizitat në Luginën e Preshevës, Medvegjës dhe Bujanocit. Përveç vizitave të ministrit Sveçla, janë refuzuar rregullisht edhe vizitat e ministrave të tjerë të kabinetit qeveritar të Republikës së Kosovës, e fundit nga të cilat ka qenë vizita e Ministrit për Kulturë, Rini dhe Sport, z. Hajrulla Çeku, e paralajmëruar ditë më parë, më 19 dhjetor 2024”. Për Ministrinë e Jashtme, këto veprime të qeverisë serbe kanë për qëllim mbajtjen e tensioneve me Kosovën në shkallë të lartë.