Greqia pritet të përballet me fundjavën më të nxehtë të korrikut në 50 vitet e fundit. Meteorologët vendas kanë raportuar se temperaturat pritet të jenë tejet të larta, ndërsa vala e të nxehtit pritet të zgjasë edhe javën e ardhshme. Autoritetet kanë këshilluar njerëzit që të punojnë nga shtëpia, nëse kanë mundësi, dhe të mos dalin nëpër rrugë nëse nuk kanë nevoja urgjente. Temperaturat përvëluese kanë detyruar që edhe shumë qendra turistike të mbyllen, për të shmangur rreziqet. Një periudhë kaq e gjatë me temperatura shumë të larta, nuk është e zakonshme kryesisht për kryeqytetin grek. Pak ditë më parë Greqia mori vendimin drastik për të mbyllur Akropolin antik për shkak të temperaturave të larta. Mbyllja u bë për të mbrojtur turistët, teksa jugu i Evropës është goditur nga një valë e të nxehtit. Agjencia Hapësinore Evropiane, satelitët e së cilës monitorojnë temperaturat në tokë dhe det, ka paralajmëruar se Italia, Spanja, Franca, Gjermania dhe Polonia po përballen me kushte ekstreme. Ndërkaq, mjekët kanë rekomanduar që të moshuarit dhe ata që kanë probleme shëndetësore të shmangin daljen jashtë për shkak se ata janë më të rrezikuar nga vala e të nxehtit. Nga ana tjetër ministrat raportuan se zjarrfikësit janë duke luftuar me dhjetëra zjarre aktive, ku prej ditësh po përballet me situatë të vështirë, ndërsa zjarret në disa vende dolën jashtë kontrollit. Shumë vende i kanë ardhur në ndihmë Greqisë, me zjarrfikës dhe helikopterë, që kanë shërbyer për shuarjen e zjarreve.