Presidenti i Shteteve të Bashkuara, Donald Trump, ka deklaruar të mërkurën se ka zhvilluar një bisedë telefonike me presidentin rus Vladimir Putin, ku në qendër të diskutimeve ka qenë mundësia e një armëpushimi në luftën në Ukrainë, e cila tashmë ka hyrë në vitin e katërt. Trump u shpreh se gjatë komunikimit me shefin e Kremlinit është folur për një ndërprerje të përkohshme të luftimeve, e cila mund të lidhej edhe me përvjetorin e përfundimit të Luftës së Dytë Botërore, që shënohet muajin e ardhshëm. “Patëm një bisedë të mirë, e njoh prej kohësh”, tha Trump, duke komentuar tonin e diskutimit me presidentin rus. Duke folur përpara gazetarëve në Zyrën Ovale, gjatë një takimi me astronautët e misionit “Artemis II,” Trump theksoi se kishte propozuar edhe vetë idenë e një “armëpushimi të vogël” në konfliktin në Ukrainë, si një hap i mundshëm drejt uljes së tensioneve në terren. Këshilltari presidencial rus Yuri Ushakov raportoi për agjencinë “Tass”, pas telefonatës midis dy presidentëve se Vladimir Putin e kishte informuar Donald Trumpin për gatishmërinë e tij për të shpallur një armëpushim në Ukrainë gjatë festimeve të Ditës së Fitores më 9 maj.