Një drejtuese ekzekutive e kompanisë financiare JP Morgan, 37-vjeçarja me origjinë shqiptare Lorna Hajdini, është përfshirë në një rast të rëndë që ka trazuar komunitetin financiar dhe ka hapur një debat mbi kulturën e punës brenda institucioneve të mëdha. Hajdini akuzohet për ngacmim dhe abuzim seksual ndaj një punonjësi të bankës, sipas një padie të dorëzuar në Gjykatën Supreme të Qarkut të Nju Jorkut nga një paditës anonim, i identifikuar si “John Doe”. Paditësi ka vendosur të mbajë identitetin e fshehur për të mbrojtur veten dhe familjen e tij nga kërcënimet që pretendohet se ka marrë pas ngjarjeve.