Sërf, joga dhe punë me kompjuter në plazh. Këto janë benefitet që do të përfitojnë punonjësit e Mc Engineering, kompani kjo me seli në Torino dhe që operon në fushën e IT. Më 15 shkurt, një grup prej disa të punësuarish, sipas medias italiane Corriere, do të udhëtojnë drejt ishullit Fuerteventura. Ata do të qëndrojnë në një resort të dedikuar për ta ku do të punojnë dhe do të pushojnë njëkohësisht. Punonjësit do të bëjnë tetë orë punë për pesë ditë, dhe më pas kohën e lirë do e kalojnë duke gatuar, duke marrë mësime sërfi si dhe dukë bërë joga. Të gjitha këto janë të paguara nga kompania, duke përfshirë këtu edhe udhëtimin, ushqimin si dhe akomodimin. Puna e zgjuar dhe bashkëjetesa në ishujt Kanarie në Spanjë, është një nismë e re përmes të cilës kompania Mc Engineering synon të lehtësojë punën dhe të rritë kreativitetin akoma më shumë në radhët e punonjësve. Nisma që pritet të fillojnë në 2024 është mirëpritur nga 200 punonjës. “Ne do të fillojmë me projektin në vitin 2024 në grupe prej 15 personash. Kolegët e parë do të zbarkojnë në Fuerteventura në shkurt, pastaj do të ketë udhëtime dhe në maj dhe tetor”, shpjegon menaxherja e burimeve njerëzore Valeria Pacicca ndërsa shton se kompania zgjodhi ishullin spanjoll për të rritur energjitë pozitive tek punonjësit. Pamjet: AFP