Puna për zgjerimin e Bashkimit Europian do të përshpejtohet. Për të arritur këtë qëllim, presidentja e Komisionit Evropian Ursula Von der Leyen do të emërojë një komisioner të dedikuar për zgjerimin e unionit drejt Ballkanit Perëndimor. Lajmi u bë i ditur nga vetë presidentja në forumin Strategjik të Bledit në Slloveni, ku është i pranishëm edhe kryeministri Edi Rama. “Më lejoni të jem shumë e qartë. Dua që puna jonë të përshpejtohet edhe më tepër. Në Komisionin e ardhshëm, zgjerimi duhet të jetë një punë me kohë të plotë që mundëson dhënien e një vëmendjeje të pashkëputur. Kjo është arsyeja pse unë do të emëroj një Komisioner të dedikuar për Zgjerimin. Le të shkruajmë së bashku të ardhmen. Rusia është vazhdimisht në punë ëpr të mbjellë përcarje brenda ballkanit perendimor. Shumica e ballkanit perëndimor duan integrim dhe kjo është ajo që duhet tju japim. Zgjerimi është investim në forcën dhe sigurinë tonë kolektive.” Plani i ri i rritjes për Ballkanin Perëndimor ka dhënë rezultate konkrete, të cilat presidentja e Komisionit Europian i renditi për secilin shtet të ballkanit. Ajo e veçoi shqipërinë kryesisht për rritjen e numrit të udhëtareve, me aeroportin e Tiranës që ka patur rritjen më të shpejtë në europë. “Ju, udhëheqësit e Ballkanit Perëndimor me të drejtë duhet të jeni shumë krenarë. Tirana është aeroporti me rritjen më të shpejtë në Evropë. Kompanitë evropiane po vendosen në Serbi dhe Bosnje Hercegovinë me një hap të përshpejtuar. Reformat ekonomike të Kosovës po sjellin përfitime ekonomike. Investimet e Maqedonisë së Veriut në infrastrukturë janë burim frymëzimi. Mali i Zi sapo ka përjetuar rritjen e vlerësimit të kreditimit.” Presidentja e Komisionit Europian bëri të ditur gjithashtu se tre vende të Ballkanit Perëndimor do ti bashkohen deri në fund të vitit zonës se vetme të pagesave në euro.