Parlamenti Europian miratoi këtë të enjte një rezolutë për procesin e zgjerimit të BE përmes së cilës kërkon që të hiqet vetoja për vendet anëtare. Rezoluta u mbështet nga 305 deputetë, ndërsa 157 votuan kundër dhe 71 abstenuan. Nisma synon që procesi I integrimit të bëhet më efikas për vendet e Ballkanit Perëndimor, kryesisht Shqipërinë, Malin e Zi, Maqedoninë e Veriut, Serbinë, Bosnjën po jo vetëm, ndërsa I kërkon Bashkimit Europian që të vendos dhe një buxhet efikas me qëllim që të përballojë procesin e zgjerimit. Rezolua vjen në një kohë kur Unioni po përgatitet për zgjedhjet e reja që do të mbahen në qershor. Ndërkohë çështja e zgjerimit ka ngjallur shpesh debate pasi vendet anëtare duhet të gjejnë konsensus për të vendosur nëse do të lejonin zgjerimin ose jo. Kjo ka krijuar shpesh ngërçe pasi shtete të ndryshme anëtare kanë bllokuar përmes vetos vendime edhe kur të gjithë vendet e tjera ishin pro. “BE-ja ka nevojë për një vizion afatgjatë politik dhe për reforma institucionale dhe financiare për të siguruar kapacitete për absorbimin e anëtarëve të ri”, shkruhet në tekstin e rezolutës që u miratua nga deputetët e Parlamentit Evropian, të cilët kërkojnë që përgatitjet për zgjerim të zhvillohen paralelisht edhe në BE edhe në vendet kandidate. Përmes kësaj rezolute PE propozon që të përdoret votimi me shumicë të kualifikuar për të përmirësuar barazpeshën mes vendeve të mëdha dhe atyre të vogla. Po ashtu Parlamenti është rreshtuar kundër vendosjes së afateve për çështjen e anëtarësimit ndonëse mbështet reformat që vendet kandidate duhet të marrin.