Presidentja meksikane, Claudia Sheinbaum, deklaroi të hënën se SHBA do të shtyjnë vendosjen e tarifave prej 25% për mallrat nga Meksika për një muaj pas një "bisede pozitive" që kishte zhvilluar me kreun e Shtëpisë së Bardhë, Donald Trump. Sheinbaum ka thënë se ajo dhe presidenti amerikan kanë arritur një marrëveshje, duke përfshirë përforcimin e kufirit nga Meksika duke vendosur në mënyrë të menjëhershme 10,000 trupa të Gardës Kombëtare. Edhe presidenti Trump e ka konfirmuar "pauzën e menjëhershme" në tarifat e parashikuara për mallrat nga Meksika përmes një postimi në Truth Social. “Ne ramë dakord të ndalojmë menjëherë tarifat e parashikuara për një periudhë njëmujore gjatë së cilës do të kemi negociata të kryesuara nga sekretari i Shtetit, Marco Rubio,”, ka shkruar ai. Trump kishte thënë se një taksë 25% e importit për mallrat nga Meksika do të fillonte të martën, së bashku me tarifat për mallrat nga Kanadaja dhe Kina. Gjatë së hënës ai ka shfaqur një ndryshim kursi, kur ka pohuar se do të bisedojë edhe me kryeministrin kanadez, Xhastin Trudo, duke lënë të hapur mundësinë për arritjen e një marrëveshjeje. Ai ka thënë gjithashtu se në 24 orët e ardhshme do të flasë edhe me Kinën për tarifat e reja. Presidenti i SHBA paralajmëroi tarifa të reja edhe për Europën, ndërsa përgjigjen e mori nga presidenti i Francës, Emmanuel Macron. “Europa duhet të respektohet dhe nëse ka presione të jashtme ekonomike, e gjithë bota duhet ta dijë se situatat e vështira vetëm sa na bëjnë më të bashkuar”, tha Macron. I provokuar nga gazetarët nëse Elon Musk nuk po e pyet për vendimet që merr, Trump u tregua i prerë: “Elon Musk nuk merr asnjë vendim pa miratimin tim. Nuk kam vërejtur konflikt interesi në lidhje me gjërat që ka bërë”.