Çmimet e naftës ranë nën 70 dollarë në tregjet ndërkombëtare pas paralajmërimit të Donlad Trump për tarifa të reja për më shumë se 68 shtete të botës. Në tregun e Londrës, çmimi i një fuçie naftë ishte 69.80 dollarë. Në tregun amerikan, një fuçi u tregtua me 67.49 dollarë. Rënie patën edhe tregjet e aksioneve. Indeksi referues Stoxx 600 i Evropës ra me 1.89%, ndërsa indeksi DAX i Gjermanisë ra me 2.66% dhe indeksi CAC 40 i Francës ra me 2.91%. Secili prej indekseve shënoi humbjen e tij më të madhe ditore që nga fillimi i prillit, raporton CNN. Urdhri ekzekutiv i presidentit të SHBA Donald Trump vendos tarifa për mallrat nga 69 partnerë tregtarë që variojnë nga 10-41 për qind. Kjo do ta rriste tarifën mesatare amerikane, sipas llogaritjeve të analistëve të ekonomisë, nga 2.3 për qind më 2024 në rreth 18 për qind. Tarifat e reja pritet të hyjnë në fuqi më 7 gusht, por për këshilltarët ekonomik të presidentit ka "zero prova" që çmimet e mallrave do të rriten për amerikanët, pavarësisht paralajmërimeve se tarifat do të godasin drejtpërdrejt konsumatorët. Ndërsa Bashkimi Evropian arriti një marrëveshje tregtare me Shtetet e Bashkuara që përfshin një tarifë prej 15% për importet e mallrave të BE-së, ekonomistët dhe politikanët kanë tërhequr vëmendjen ndaj mungesës së detajeve në marrëveshje dhe pasi druajnë se tarifat mund të dëmtojnë ekonominë evropiane.