Pavarësisht marrëveshjes së fundit me vedenet e BE-së por edhe me Kinën e Japoninë, Presidenti amerikan Donald Trump nuk e ndal luftën e tarifave. Së fundmi Trump ka shpallur masa të reja tregtare, duke rritur në 50% tarifat doganore mbi importet e bakrit dhe produkteve me përmbajtje të lartë bakri nga të gjitha vendet. Brazili është një vend që do duhet të paguajë 40% tarifa shtesë. Këtë vendim Trump e arsyetoi me veprimet e qeverisë braziliane, të cilat sipas presidentit amerikan “përbëjnë kërcënim të jashtëzakonshëm për sigurinë kombëtare dhe ekonominë e SHBA-së”. Ndëshkim do të ketë edhe për Indinë. Një nga shtetet më të mëdha të botës do të duhet të paguajë tashmë tarifa prej 25% për shkak se bleu naftë dhe pajisje usdhtarake nga Rusia. Në shkurt, gjatë një takimi me kryeministrin indian, Narendra Modi, Trump kishte deklaruar se India do të fillonte të blinte naftë dhe gaz natyror amerikan. Trump tha se i konsideron të ardhurat nga tarifat si një mënyrë për të kompensuar rritjen e deficitit buxhetor të shkaktuar nga uljet e taksave mbi të ardhurat, si dhe për të nxitur krijimin e vendeve të reja të punës në prodhimin vendor. Sipas të dhënave të Byrosë së Statistikave të SHBA-së, vitin e kaluar SHBA kishte një deficit tregtar prej 45.8 miliardë dollarësh me Indinë, që do të thotë se kishte importuar më shumë se sa kishte eksportuar.