Gjatë takimit me presidentit francez, Emmanuel Macron, presidenti amerikan, Donald Trump, ka refuzuar ta quajë “diktator” presidentin rus, Vladimir Putin. Ai ka deklaruar se Ukraina dhe Rusia kanë një shans “për një zgjidhje shumë të mirë” teksa foli për agresionin rus. Trump ka shtuar se një luftë e pazgjidhur mes dy vendeve “mund të çojë në një luftë të tretë botërore”. “Unë mendoj se lufta në Ukrainë mund të përfundojë së shpejti, ndoshta brenda javësh, nëse ne do të tregohemi të zgjuar. Nëse nuk jemi të zgjuar, do të vazhdojë. Ne nuk e duam këtë. Mos harroni atë që thashë, kjo mund të përshkallëzohet në një luftë të tretë botërore. Ne nuk e duam as atë”, ka deklaruar presidenti i SHBA në Zyrën Ovale. Macron është shprehur se me Trump patën një diskutim të mirë, duke përfshirë “një paqe afatgjatë”. “Ai ka theksuar se Evropa është e gatshme të përshpejtojë mbrojtjen. Trump është shprehur se mijëra njerëz nga Rusia dhe Ukraina kanë vdekur pa qenë nevoja, duke shtuar se është momenti i duhur që luftës t'i jepet fund. Ai është shprehur se edhe vendet evropiane duhet të kontribuojnë në sigurimin e paqes, e jo vetëm SHBA-ja. “Evropa duhet të marrë rol qendror për të garantuar sigurinë afatgjatë të Ukrainës, gjë që ne vërtetë duam ta bëjmë”, ka thënë Macron ndër të tjera.