Kreu i opozitës, Sali Berisha, vijoi denoncimet për Edi Ramën në Asamblenë Parlamentare të Këshillit të Evropës, edhe në takimet e pasdites. Në një tryezë me grupin konservator të kësaj asambleje, nga Strasburgu ku udhëtoi prej mëngjesit të së hënës, Berisha tha se Rama ka vendosur pajisje DPI për të kontrolluar internetin. “Njësoj si Habibullah-u i Kabulit, ai bllokoi TikTok-un. Dhe tani ka instaluar pajisje DPI për të kontrolluar gjithashtu internetin. Kjo është e vërtetë. Sapo të rinjtë filluan ta kritikojnë në TikTok, ai e ndaloi dhe e bllokoi TikTok-un. Ai bën gjithçka për të kufizuar komunikimin tonë me njerëzit”. Për të shpëtuar kombin, siç tha vetë Berisha, duhet ndihma e eurodeputetëve, që të sjellin një grup vëzhgues në zgjedhjet e 11 majit. “Dërgoni një mision verifikimi, sepse do të dëgjoni gjëra të pabesueshme. Krimi i organizuar është shumë i famshëm dhe shumë i përfshirë në zgjedhje. Komunikimi arrin deri tek Edi Rama dhe ministrat e tij. Dhe kur të prekni realitetin atje, atëherë mund të gjeni një mënyrë për të ndihmuar kombin tim, për të ndihmuar vendin tim të çlirohet nga kjo narkodiktaturë”. Sali Berisha e akuzoi Ramën se po drejton si narkodiktator, dhe sipas tij, kjo është e rrezikshme për gjithë kontinentin.