Vrasja e liderit politik të Hamasit Ismail Haniyeh në Teheran përfaqëson një përshkallëzim të madh të tensioneve midis Iranit dhe Izraelit. Udhëheqësi suprem i Iranit Ayatollah Khamenei ka fajësuar Izraelin për sulmin ajror dhe tha se vrasja kërkonte “një dënim të ashpër”. “Ne do ta bëjmë regjimin okupator terrorist të pendohet për veprimin e tij”, tha në një deklaratë, presidenti i ri i vendit, Massoud Pezeshkian. Izraeli nuk është përgjigjur ende, por më parë është zotuar të eliminojë liderët e Hamasit pas sulmit të 7 tetorit. Shqetësimi i menjëhershëm tani është përgjigja e Iranit, çfarë forme mund të marrë dhe nëse do të nxiste tensionet në rajon, të cilat tashmë janë në nivelin më të lartë të të gjitha kohërave. Mendohet se Irani tani mund të lëshojë një sulm të një lloji të ngjashëm ndaj Izraelit. Teherani gjithashtu mund t’u kërkojë milicive të tij përfaqësuese në rajon që të shtojnë sulmet e tyre, raporton BBC. Hezbollahu tashmë ka një arsye për të përshkallëzuar luftën e tij raketore ndërkufitare me Izraelin. Vrasja e Haniyeh erdhi vetëm disa orë pas vrasjes së një prej komandantëve të lartë ushtarakë të grupit në Bejrutin jugor. Tashmë ka persona në rajon që besojnë se tensionet midis Izraelit dhe Hezbollahut mund të ndezin vetë një luftë në shkallë të gjerë. Raportet nga Teherani thonë se këshilli kombëtar i sigurisë së vendit ka mbajtur një takim urgjent në rezidencën e Ajatollah Khameneit. Ajo që është vendosur nuk është bërë publike, por forma dhe koha e përgjigjes së Iranit janë pyetjet që ka shumë të ngjarë të jenë diskutuar.