Zyrtarët amerikanë dhe ata ukrainas pritet të takohen javën tjetër në Arabinë Saudite ku pritet të nënshkruhet marrëveshja e shumëpërfolur për metalet e rralla. Dy palët janë duke punuar që t’i shtensionojnë marrëdhëniet pas takimit “katastrofik” ndërmjet presidentit Donald Trump dhe homologut të tij Volodymyr Zelensky, të premten e kaluar në Uashington. Këshilltari i lartë për Sigurinë Kombëtare të SHBA-së, Mike Waltz, ka thënë se diskutimet midis dy ekipeve po intensifikohen për një raund të ri të negociatave. “Po zhvillojmë biseda të mira për vendndodhjen e raundit të ardhshëm të negociatave, për delegacionet, dhe për thelbin e gjërave. Pra, vetëm në 24 orët e fundit që nga deklarata publike e Zelenskyt dhe pastaj bisedat e mëtejshme, të cilat unë do të t’i vazhdoj brenda, mendoj se do të shohim lëvizje domethënëse në një periudhë shumë të shkurtër”, ka deklaruar Waltz. Këtë deklaratë e konfirmoi pak orë më vonë të enjten edhe Presidenti i Ukrainës, Volodymyr Zelensky, i cili deklaroi se shteti që ai drejton do të punojë në mënyrë konstruktive me presidentin amerikan, Donald Trump. Pas samitit me vendet evropiane që u mbajt të enjten, Zelensky ka thënë se bashkëpunimi me SHBA-në do të bëhet për të arritur një paqe të shpejtë dhe të qëndrueshme. Ai e ka konfirmuar takimin e palës ukrainase me atë amerikane gjatë javës së ardhshme në Arabinë Saudite. “Ekipi im do të qëndrojë në Arabinë Saudite për të punuar me partnerët amerikanë”, u shpreh ai.