Pak muaj pas takimit të tensionuar në Zyrën Ovale me Presidentin amerikan, Donald Trump, udhëheqësi ukrainas, Volodymyr Zelensky, rikthehet në Shtëpinë e Bardhë. Ai u prit nga Presidenti Trump, ku ky i fundit pyetjes së gazetarëve nëse do ta bindte homologun rus, Vladimir Putin, që t’i jepte fund luftës në Ukrainë, iu përgjigj me një shenjë dakordësie me kokë. Pas përshëndetjes, dy presidentët iu drejtuan dhomës së kabinetit të Shtëpisë së Bardhë, ku në takim ishin të pranishëm edhe Zëvendëspresidenti JD Vance dhe Sekretari i Shtetit Marco Rubio. Në takimin që po zhvillohet në Uashington, Presidenti Zelensky do të kërkojë nga Trump raketa Tomahaëk për luftën kundër pushtimit të vendit të tij nga Rusia. Presidenti amerikan, Donald Trump, duke e kthyer vëmendjen te sulmi i Moskës ndaj Ukrainës pas një nisme të suksesshme diplomatike në Lindjen e Mesme, tha se Shtetet e Bashkuara mund t’i ofrojnë Kievit këto lloje raketash. Por, mundësia që Trump t’i japë këto raketa Ukrainës ka rënë pas bisedës që presidenti amerikan pati me Putinin, ku të dy ranë dakord për t’u takuar javën e ardhshme në Budapest të Hungarisë.