Autoritetet në Kosovë arrestuan tetë të dyshuar dhe konfiskuan një arsenal armësh, përfshirë eksploziv, në një operacion të gjerë në veri , pas shpërthimit në kanalin e Ibër-Lepencit. Detajet e operacionit I bëri të ditura ministri i Brendshëm, Xhelal Sveçla. Ministri Sveçla tha se shumica dërrmuese e armatimit dhe pajisjeve të tjera të konfiskuara janë “prodhim serb” dhe se një pjesë e madhe e tyre janë “pajisje ekskluzivisht ushtarake” që nuk mund të gjendet lehtë në tregun e zi. Të arrestuarit dyshohen për lidhje dhe nxitje të sulmeve të fundit në veri të vendit gjatë kësaj jave, si sulmi me granata dore në stacionin policor dhe në ndërtesën e Komunës në Zveçan. Shpërthimi me rreth 20 kg eksploziv shkaktoi dëme të konsiderueshme në kanalin e ujit të Ibër-Lepencit në fshatin Varragë të komunës së Zubin Potokut, ndërsa autoritetet kosovare akuzuan Serbinë për sulm “kriminal dhe terrorist” ndaj infrastrukturës jetike të vendit. Kurti e vizitioi vetë fshatin Varagë të Zubin Potokut së bashku me ministrin e Punëve të Brendshme, Xhelal Sveçla dhe drejtorin e Policisë, Gazmend Hoxha. Autoritetet kosovare njoftuan se uji i Ibër-Lepencit është i papijshëm, ndërsa furnizimi meenergji elektrike është i qëndrueshëm.