Dy javë pas sulmit terrorist në Banjskë, autoritetet e Kosovës vijojnë të zbardhin fakte që, sipas tyre, vërtetojnë lidhjen direkte të Serbisë në organizimin dhe realizimin e kësaj ngjarjeje. Ministri i Punëve të Brendshme Xhelal Sveçla publikoi në rrjetet sociale një dokument që I përket Millorad Jevtiçit, i cili “njihet si një ndër bashkëpunëtorët më të afërt të Danillo Vuçiç, djalit të presidentit serb, Aleksandar Vuçiç”. Ai tha se gjetja e këtij dokumenti dëshmon se Jevtiç ka qenë i përfshirë në sulmin ndaj policisë së Kosovës. Xhelal Sveçla - Ministri i Punëve të Brendshme të Kosovës Në vendin e ngjarjes ku ka ndodhur sulmi, njësitet policore kanë gjetur dokumentin personal dhe veturën e Milorad Jevtic gjë që dëshmon se ai ka qenë në njësitin që kanë sulmuar Policinë e Kosovës. Terroristi Milorad Jevtic njihet si një ndër bashkëpunëtorët më të afërt të Danilo Vuciq, djalit të presidentit serb Aleksandar Vuciq. Nga 5 vizitat e fundit të djalit të Vuciqit në Kosovë, 4 herë ata kanë qenë bashkë në të njejtën veturë. Sipas Sveçlës, Millorad Jevtiç është identifikuar edhe si njëri ndër sulmuesit e ushtarëve të KFOR-it më 29 maj në Zveçan, ndërsa kërkoi hetim dhe për djalin e presidentit serb.