Gjykata Themelore në Prishtinë shpall pasditen e sotme aktgjykimin për tre të akuzuarit lidhur me sulmin e armatosur në Banjskë më 24 shtator 2023, ku mbeti i vrarë rreshteri i Policisë së Kosovës, Afrim Bunjaku. Të akuzuarit Bllagoje Spasojevic, Vlladimir Tollic dhe Dushan Maksimovic janë pjesë e një grupi prej 45 individësh ndaj të cilëve u ngrit aktpadi një vit pas sulmit në pjesën veriore të Kosovës. Në mesin e tyre është edhe Millan Radoiçic, ish-nënkryetar i Listës Serbe, i cili akuzohet si “kreu i grupit terrorist”. Gjykata e ka ndarë më vete procesin ndaj Spasojevicit, Tollicit dhe Maksimovicit, të cilët janë në paraburgim që nga shtatori 2023. Për 42 të tjerët, ajo refuzoi kërkesën e Prokurorisë Speciale për gjykim në mungesë. Prokuroria pretendon se të akuzuarit përdorën dhunë dhe armatime të rënda për të tentuar shkëputjen e pjesës veriore të Kosovës dhe bashkimin e saj me Serbinë. Gjatë sulmit, rreshteri Bunjaku u vra, polici Alban Rashiti u plagos, dhe u lënduan policët Çlirim Sahiti, Mirsad Kryeziu dhe Sedat Dushi. Gjithashtu, u vunë në rrezik jetët e policëve të tjerë dhe qytetarëve. Spasojevic, Tollic dhe Maksimovic i mohojnë akuzat. Për të tre ata, Prokuroria ka kërkuar dënim me burgim të përjetshëm.