11 adoleshentë dhe të rinj janë vrarë dhe 19 janë plagosur pas një sulmi që goditi një fushë futbolli në Lartësitë e Golanit të pushtuar nga Izraeli, sipas emergjencave civile të Izraelit dhe zëdhënësit të ushtrisë. Forca e Sigurisë së Izraelit tha se një raketë ra mbi zonën e Mjadal Shams. Ky është sulmi më vdekjeprurës në rajon që nga shkëmbimi ndërkufitar i zjarrit mes ushtrisë izraelite dhe Hezbollahut, i intensifikuar pas nisjes së luftës në Gaza. Izraeli drejtoi gishtin nga Hezbollahu si përgjegjës, por një zëdhënës i grupit militant mohoi çdo lidhje me incidentin. Përpara se të raportohej mbi dëmet që kishte shkaktuar ky sulm, Hezbollahu kishte marrë përgjegjësinë për katër sulme të mëparshme. Këto erdhën pas një sulmi që Izraeli bëri në Liban duke vrarë katër militantë. Kryeministri izraelit benjamin njetanjahu i cili është në një vizitë në shtetet e bashkuara, ka ndryshuar axhendën duke e sjellë më afër datën e rikthimit në vendin e tij. Frikërat po rriten që pas këtij incidenti një luftë total të shpërthejë edhe mes Izraelit dhe Libanit. Presidenti izraelit Isaac Herzog e quajti incidentin një "katastrofë të tmerrshme dhe tronditëse" dhe tha se "shteti i Izraelit do të mbrojë me vendosmëri qytetarët dhe sovranitetin e tij". Qeveria e Libanit lëshoi gjithashtu një deklaratë të rrallë në përgjigje, duke thënë se "dënon të gjitha aktet e dhunës dhe agresionit kundër të gjithë civilëve dhe bën thirrje për një ndërprerje të menjëhershme të armiqësive në të gjitha frontet. Vënia në shënjestër e civilëve është një shkelje flagrante e ligjit ndërkombëtar dhe bie ndesh me parimet e njerëzimi." Videot nga vendngjarja tregojnë turma njerëzish në një fushë futbolli dhe barela që nxitojnë në pritje të ambulancave. Majdal Shams është një nga katër fshatrat në lartësitë e Golanit, ku jetojnë rreth 25,000 anëtarë të komuniteti Druze. Atyre iu ofrua shtetësia izraelite kur Lartësitë e Golanit u aneksuan nga Siria në vitin 1981, por shumica e refuzuan. Aneksimi i lartësive të golanit nuk është pranuar nga shumica e komunitetit ndërkombëtar.