Një makinë me shpejtësi të lartë përplasi të premten turmën e njerëzve në një treg Krishtlindjesh në qytezën lindore gjermane, Magdeburg. Sipas autoriteteve dy persona humbën jetën dhe 68 të tjerë janë plagosur të premten, ndërsa mediat raportonin për më shumë se 11 të vdekur. Autoritetet lokale e cilësuan sulmin si terrorist. Dëshmitarët kanë thënë se makina është nisur qëllimshëm drejt turmës së njerëzve, ndërsa agjencitë vendëse të lajmeve raportuan se shoferi i makinës, një 50-vjeçar nga Arabia Saudite, është arrestuar. Sulmi ka ndodhur rreth orës 19:04 lokale, ndërsa automjeti i përfshirë ishte një BMË e errët, që ka ecur me shpejtësi të lartë për 400 metra në turmën me njerëz. Mes personave të lënduar, një fëmijë 4 vjeç është në gjendje kritike për jetën. Mësohet se në sheshin e qytetit ku ndodhi ngjarja ka pasur edhe shqiptarë, por sipas reagimit të ministrisë sonë të jashtëme nuk ka asnjë të lënduar. Top Channel ka siguruar pamjet pak minuta pas sulmit dhe në video, duken dhjetëra qytetarë dhe turistë të shtrirë në tokë pasi i shpëtuan sulmit. Ata duken të frikësuar dhe në panik, pasi makina e autorit hyri mes turmës. Tregu i Krishtlindjeve u mbyll pas ngjarjes ndërsa autoritet bënë thirrje që të gjithë të largoheshin nga qendra e qytetit. Tetë vite më parë, më 19 dhjetor të vitit 2016, një pjesëtar i grupit terrorist, ISIS, pati kryer një sulm me kamion, duke e përplasur njerëzit në një treg Krishtlindjesh në qendër të Berlinit. Si pasojë e sulmit asokohe humbën jetën 12 persona, ndërsa u plagosën mbi 70 të tjerë. Sulmuesi arriti të ikte në Itali, por aty më pas u identifikua dhe u ekzekutua nga policia.