Tre persona mbetën viktimë e një sulmi që dyshohet se kishte motive racore në Florida të Shteteve të Bashkuara. Autori ishte një i ri rreth të 20-tave që mbante një pushkë automatike dhe një pistoletë dhe pasi hyri në një dyqan në Jacksonville hapi zjarr, duke vrarë dy burra dhe një grua me ngjyrë. Vrasësi, identiteti i të cilit ende nuk është bërë publik, la disa shënime me gjuhë urrejtjeje, drejtuar prindërve, mediave dhe agjentëve federalë para se të vriste veten, thonë zyrtarët e policisë. “Një krim të mbushur me urrejtje raciste”, e cilësoi sulmin kryebashkiaku Donna Deegan. “Agresori sulmoi viktimat në baze të racës së tyre dhe kjo është e papranueshme. Ky djalosh vrau veten në vend që të pranonte përgjegjësinë për veprimin e tij fatal”, u shpreh për mediat guvernatori i Floridës, Ron DeSantis.