Momente paniku përjetuan kalimtarët në Times Square të Nju Jorkut, ku një grua sulmoi me thikë në mënyrë të rastësishme dy persona, duke vrarë një prej tyre, ndërsa më pas u qëllua për vdekje nga policia. Të shtënat ndodhën pranë një stacioni policie të Departamentit të Policisë së Nju Jorkut pikërisht përballë One Times Square, ndërtesës ku zhvillohet çdo vit ceremonia e numërimit mbrapsht për Vitin e Ri. Bëhet fjalë për një nga vendet më të frekuentuara nga turistët dhe më të mbikëqyrura nga policia në të gjithë Nju Jorkun. Gruaja, 49 vjeçe dhe banore e Queens-it, nxori dy thika nga një qese pazari dhe goditi me thikë në bark një burrë 68-vjeçar, i cili sapo kishte dalë nga stacioni i metrosë dhe po priste të kalonte rrugën së bashku me bashkëshorten e tij, deklaroi komisionerja e policisë, Jessica Tisch. Pak sekonda më vonë, gruaja goditi me thikë në bark edhe një grua 32-vjeçare, shtoi Tisch. Të dy viktimat u transportuan në spital. Gruaja humbi jetën, ndërsa burri është në gjendje të qëndrueshme, sipas policisë. Autoritetet nuk kanë bërë të ditur nëse viktimat ishin turistë apo banorë të qytetit. Video të publikuara në rrjetet sociale tregojnë një grup prej të paktën dhjetë policësh të mbledhur rreth gruas. Sipas Tisch, policët u përpoqën për disa minuta ta bindnin gruan të hidhte thikat, përpara se të përdornin një taser. Pamjet tregojnë se taseri nuk arriti ta neutralizonte atë, ndërsa gruaja i kërcënoi sërish me armë efektivët, të cilët më pas e qëlluan për vdekje. 49 vjecarja rezulton të kishte pasur probleme të ngjashme me NYPD në vitet 2018 dhe 2019, incidente që duket se lidheshin me shëndetin e saj mendor, por nuk kishte precedentë arrestimi nga ky departament.